उत्साह, आनंद, शिट्ट्या, टाळ्या, आरडाओरडा, तासन् तासची प्रतीक्षा, मोबाइल कॅमेऱ्यांचे फ्लॅश... अशा असंख्य भावभावनांची मांदियाळी रविवारी मुंबईकरांच्या 'मोनो'च्या पहिल्यावहिल्या प्रवासावेळी पाहायला मिळाली. 'मोनो'च्या पहिल्या प्रवासाचे साक्षीदार होण्यासाठी चेंबूरला अक्षरशः जत्रा भरली होती. लहानथोरांच्या अलोट गर्दीमुळे पहिल्याच दिवशी 'मोनो'चे रविवारचे व्यवस्थापन पूर्ण मोडीत निघाले. मात्र, प्रवाशांच्या उदंड प्रतिसादामुळे 'मोनो'ने सायंकाळपर्यंत जादा सेवा चालवून मुंबैकरांना खुश करून टाकले.
पहिला मानकरी!
नालासोपारा येथे राहणारे सुनील खाडे यांचा उत्साह कमालीचा होता. त्यांनी 'मोनो'वरील पहिला प्रवासी होण्याचा मान मिळवला. त्यासाठी त्यांनी रात्रीच वडाळा ट्रक टर्मिनस येथील स्टेशन गाठले. अंधेरीत नोकरीस असणारे खाडे रात्री दीड वाजता दादरहून टॅक्सीने वडाळा...
more... ट्रक टर्मिनसला आले. त्यानंतर तिथेच वेळ घालवून सकाळी 'मोनो'चा पहिला प्रवासी म्हणून त्यांनी रुबाबात गाडीत प्रवेश केला. त्यानंतर दुपारी त्यांनी कुटुंबास चेंबूर येथे बोलावून घेतले आणि त्यांच्याबरोबरही सैर केली.
दरवाजे अडले
अतिउत्साहामुळे प्रवाशांनी प्रत्येक डब्यात जणू हल्लाबोल चढवत प्रवेश केला. त्यामुळे डब्यांचे दरवाजे लागत नसल्याने गाडी चालत नव्हती. अशा स्थितीत प्रवाशांची संख्या मर्यादित ठेवण्याचे कठीण काम सुरक्षा यंत्रणेस करावे लागत होते.
महिला कॅप्टन
पहिली मोनो चालवण्याचा मान मराठमोळ्या जुईली भंडारे हिने मिळवला. सकाळी ७.०८ वाजता वडाळा टीटी ते चेंबूर मार्गावर धावलेल्या पहिल्या 'मोनो'चे सुकाणू भंडारे आणि सुमनकुमार यादव यांनी सांभाळले.