दौलताबाद-चाळीसगाव मार्गाला रेल्वेचाच खोडा
Maharashtra Times | Updated:Aug 5, 2018, 04:00AM IST
म. टा. प्रतिनिधी, औरंगाबाद
सोलापूर-धुळे या राष्ट्रीय महामार्गासोबत दौलताबाद ते चाळीसगाव या प्रस्तावित रेल्वे मार्गाच्या कामाला गती देण्यासाठी रेल्वे विभागाकडून कोणतीही हालचाल झाली नसल्याचे शनिवारी उघड झाले. या कामाचा कुठलाही प्रस्ताव रेल्वे विभागाने आपल्याकडे सादर केला नाही. रेल्वे प्रशासन या कामाबाबत उदासीन आहे, अशा शब्दांत केंद्रीय दळणवळण मंत्री नितीन गडकरी यांनी पोलखोल...
more... केली.
औरंगाबाद-चाळीसगाव या ८८ किलोमीटरच्या मार्गाला रेल्वेने मान्यता दिली. याचे सर्व्हेक्षण दीड वर्षांपूर्वी पूर्ण करण्यात आले. त्यानंतर आजही या मार्गाचे काम सुरू करण्यात आलेले नाही. हा प्रस्तावित रेल्वे मार्ग राष्ट्रीय महामार्गासोबत करावा, अशी मागणी घेऊन मराठवाडा विकास मंडळाचे अध्यक्ष डॉ. भागवत कराड यांच्यासह रेल्वे प्रतिनिधींनी शनिवारी हॉटेल रामा येथे केंद्रीय दळणवळण मंत्री नितीन गडकरी यांची भेट घेतली. चाळीसगाव घाटात राष्ट्रीय महामार्गासाठी तयार होणाऱ्या बोगद्यामध्ये रेल्वे मार्गासाठीही बोगदा करून दिल्यास या रेल्वे मार्गाचे काम वेगात होईल. हा रेल्वे मार्ग तयार झाल्यास औरंगाबाद दिल्ली अंतर १८८ किलोमीटरने कमी होईल, असे मत डॉ. कराड यांनी मांडले. तसेच मराठवाडा रेल्वे विकास समितीचे अध्यक्ष ओमप्रकाश वर्मा यांनी तत्कालीन रेल्वे मंत्री सुरेश प्रभू यांच्याशी चर्चा करून सदर मार्ग राष्ट्रीय महामार्गासोबत करा, अशी विनंती केली होती. त्यांनीही हा प्रस्ताव तत्वत: मंजूर केला होता. याबाबत दिल्लीत गडकरी यांच्यासोबतही चर्चा झाल्याची आठवण गडकरी यांना करून देण्यात आली. तेव्हा गडकरी म्हणाले, 'सोलापूर-धुळे या राष्ट्रीय महामार्गाचे काम सध्या सुरू आहे. चाळीसगाव येथे तयार होणाऱ्या बोगद्याचे कामही सध्या सुरू आहे. याचे डीपीआर तयार करण्याचे काम प्रगतीपथावर आहे. राष्ट्रीय महामार्गासोबत रेल्वे मार्ग तयार करण्याचा प्रस्ताव दिल्यास हे काम करण्यासाठी अडचण राहणार नाही,' असे आवाहन त्यांनी केले. गडकरी यांच्या म्हणण्यानुसार आतापर्यंत रेल्वे प्रशासनाने प्रस्तावच दिला नसल्यामुळे हे काम रखडल्याचे उघड झाले आहे.
दिल्लीत पाठपुरावा करणार …
गडकरी यांच्यासोबत झालेल्या बैठकीची माहिती देताना डॉ. भागवत कराड म्हणाले, 'दौलताबाद-चाळीसगाव मार्गाच्या कामाचा प्रस्ताव द्या असे गडकरी यांनी सांगितले आहे. हे काम त्वरित सुरू करावे, यासाठी मी स्वत: दिल्लीला जाऊन रेल्वे मंत्र्यांची भेट घेऊन हे काम मार्गी लावण्यासाठी प्रयत्न करेल. जोपर्यंत या मार्गाचा प्रस्ताव रेल्वे देणार नाही, तोपर्यंत स्वस्थ बसणार नाही.'